ორ ქართველ ძალოსანს დოპინგი აღმოუჩინეს

25 ნოემბერი 2021, 12:58 340 ნახვა

საერთაშორისო ტესტირების სააგენტომ (ITA) ანტიდოპინგური წესების დარღვევის ფაქტზე 13 ძალოსანი გამოავლინა, რომელთა შორის ორი ქართველი სპორტსმენია.

ITA-მ ხელმეორედ გადაამოწმა 2012 წლის ევროპის ჩემპიონატზე აღებული სინჯები და საერთო ჯამში 13 სპორტსმენს დაუდგინდა აკრძალული ნივთერებების მოხმარება. ამ სიაში მოხვდა 2 ქართველი ძალოსანი .

2012 წლის აპრილში, თურქეთის ქალაქ ანტალიაში 85 კგ-მდე წონით კატეგორიაში რაულ ცირეკიძემ ორჭიდის ჯამში ოქროს მედალი მოიპოვა, ხოლო მძიმეწონოსანი ირაკლი თურმანიძე (+105 კგ) კი ბრინჯაოს მედლის მფლობელი გახდა.

ცირეკიძისა და თურმანიძის გარდა, სიაში 4 თურქი, 2 რუმინელი და თითო რუსი, ალბანელი, ბელარუსი, მოლდოველი და კვიპროსელი სპორტსმენია. კვლევა გერმანიის ქალაქ კიოლნში, WADA-ს (მსოფლიოს ანტიდოპინგური სააგენტო) მიერ აკრედიტებულ ლაბორატორიაში ჩატარდა.

დებულების თანახმად, ძალოსნებს უფლება აქვთ კიდევ ერთი კვლევა მოითხოვონ, თუმცა ვიდრე საქმის წარმოება არ დასრულდება, მათ შეჯიბრებზე გამოსვლის საშუალება არ ეძლევათ.

სეო წილოსანი
სპორტული ჟურნალისტი

ამავე კატეგორიაში